Birinci rübdə fişinq hallarının sayı artıb

Cari ilin ilk üç ayı ərzində Antifişinq İşçi Qrupunun (APWG) iştirakçıları 125 mindən çox fişinq sayt aşkar ediblər ki, bu da əvvəlki rübdən 10,7 faiz yüksəkdir. Fişerlər arasında daha çox populyar “TLD” zona hesabat dövründə saxta səhifələrin yerləşdirilməsi üçün istifadə olunan domenlərdə payı 46 faiz təşkil edən “.COM” domeni olub.

Regional domenlər arasında fişinq üzrə liderlər siyahısında “.BR” domeni (ümumi sayın 3 faizi) yenidən birincidir. “APWG”-nin statistikasına əsasən, fişerlər hələ də ABŞ ərazisində fəaliyyətə üstünlük verirlər.

Birinci rübdə “APWG” öz abunəçi bazası üzrə fişinq göndərişləri haqqında 172 min unikal hesabat alıb. Bu, oktyabr-dekabrın göstəricisindən 6,8 faiz çoxdur. Hücuma məruz qalan şirkətlərin sayı 525-dən 577-dək artıb. Fişerlərin əsas hədəfi əvvəlki rübdə olduğu kimi, hücumlarda payı 46,5 faiz təşkil edən ödəniş sistemləri olub. Fişerlər arasında populyarlığa görə ikinci yeri 20,1 faiz göstərici ilə maliyyə təşkilatları, üçüncünü – pərakəndə satış və xidmət sahəsi müəssisələri (11,5 faiz) tutub.

Bununla yanaşı, virusa yoluxan kompüterlərin sayı artmaqda davam edir. Belə ki, hesabat həmmüəlliflərindən biri “PandaLabs” şirkətinin məlumatına görə, yanvar-martda qlobal kompüterlərin virusa yoluxma göstəricisi 32,77 faiz təşkil edib. Daha yüksək səviyyə Asiya və Cənubi Amerikada müşahidə olunub. Ölkələr üzrə bu nəticə Çində 52,36 faiz, Türkiyə və Peruda müvafiq olaraq 43,59 və 42,14 faizə bərabər olub.

“PandaLabs”-ın istifadəçilərin kompüterlərində aşkar etdiyi təhdidlərin əksəriyyətini troyanlar (79,7 faiz yoluxma) təşkil edib, - “Cybersecurity www.cybersecurity.ru” yazır.