“eManat”ın qəbul etdiyi ödənişlərin çeşidi genişlənir

“Modenis” şirkətinin “eManat” ödəniş sisteminin göstərdiyi xidmətlərin çeşidi genişləndirilir.

“ICTnews” xəbər xidmətinin məlumatına görə, artıq “Nikoyl Bank”ın müştəriləri də “eManat”  terminalları vasitəsilə ödənişlərini tez və rahat şəkildə həyata keçirə bilərlər.

Hazırda  “eManat” terminalları Bakının və bölgələrin ən müxtəlif  ictimai məkanlarında quraşdırılıb. Ödəmə terminalları vasitəsilə kommunal xidmətlər, mobil rabitə, internet, bank kreditlərinin geri ödənişi və s. ödənişləri həyata keçirmək mümkündür. “eManat”  vasitəsilə ödəmə xidmətləri pulsuzdur. Bu terminallar həftənin bütün günləri, sutkada 24 saat ərzində işləyir.

Bu ilin sonuna qədər şirkət şəbəkəsində nəqliyyat kartlarının qəbulunu da təşkil etmək niyyətindədir. Hazırda “eManat” terminallarında “Unibank”ın, “Bank of Baku”nun, “VTB Bank”ın, “Bank Respublika”nın, bütün mobil operatorların, stasionar rabitə, həmçinin kommunal xidmətlər operatorlarının və bir sıra internet provayderlərin xidmət ödənişləri qəbul edilir.
 
Aynur Vəliyeva

---