İnkişaf etməkdə olan ölkələrin əhalisi fabletə üstünlük verirlər

Bütün dünyada, həmçinin inkişaf etməkdə olan ölkələrdə fabletlərə maraq artır. “Jana” tədqiqat firmasının əməkdaşları tərəfindən 9 ölkədə 1386 smartfon istifadəçisi arasında keçirilmiş sorğu bunu təsdiqləyib.
 
“ICTnews” elektron xəbər xidməti “dailycomm.ru” saytına istinadən bildirir ki, Hindistan, İndoneziya, Vyetnam, Meksika və Filippindən bir çox respondent 5 düymlük ekranlı telefonu satın almaq istəyir. 5,5 və daha böyükölçülü cihazlara Keniya, CAR və Braziliyada tələbat daha çoxdur.
 
 “CNET” nəşri yazır ki, Nigeriyada yerli sakinlərin 19  faizi 4 düymlük smartfonlara, 18 faizi 4,5 düymlük ekranlı modellərə, respondentlərin 17 faizi isə fabletlərə üstünlük verirlər.
 
Sorğu iştirakçılarının bir hissəsi 4 düymlük cihazlardan istifadənin daha rahat olduğunu vurğulayıb. Bəzi istifadəçilərin fikrincə, belə qurğular öz yığcamlığı və cibdə yerləşdirilmə rahatlığı sayəsində onları cəlb edir.
 
“IDC” analitiklərinin məlumatına görə, 2013-cü ildə fabletlərin qlobal tədarük həcmi 30 milyonu ötüb.
 
Emil Hüseynov

 

---