Əmək müqaviləsi bildirişi üzrə elektron informasiya sistemindən 1 milyon 752 min 383 nəfər istifadə edib
Cari ilin sentyabr ayında Əmək və Əhalinin Sosial Müdafiəsi Nazirliyinin (ƏƏSMN) “Əmək müqaviləsi bildirişlərinin qeydiyyata alınması və bu barədə işəgötürənə məlumatın verilməsi” elektron xidmətindən 1 042 712 nəfər istifadə edib.
Bu göstərici ilə qeyd olunan elektron xidmət növü “Elektron hökumət” portalında (
www-e-gov.az) ən çox istifadə olunan elektron xidmətlər üzrə təqdim etdiyi siyahıda birinci yerdədir.
Eyni zamanda ƏƏSMN-in “Əmək müqaviləsi bildirişləri barədə məlumatların işçilər tərəfindən əldə edilməsi” elektron xidmətindən yararlanan vətəndaşların sayı da getdikcə artır. Son bir ayda bu xidmət növü 73 055 nəfər istifadəçi sayı ilə həmin siyahıda 3-cü yerdə qərarlaşıb. Beləliklə, cari ilin sentyabr ayı ərzində ƏƏSMN-in (
www.mlspp.gov.az) əmək müqaviləsi bildirişi üzrə elektron informasiya sistemi (EİS) 1 116 873 nəfər istifadəçi ilə ilk yeri tutur.
Nazirliyin İctimaiyyətlə əlaqələr şöbəsindən bildirilib ki, bu ilin iyulun 1-dən istifadəyə verilən ƏƏSMN-in əmək müqaviləsi bildirişi üzrə elektron informasiya sistemindən son 3 ay ərzində isə ümumilikdə 1 milyon 752 min 383 nəfər istifadə edib: “Bu elektron xidmətdən istifadə edənlərin sayının çoxluğu əmək müqaviləsi bildirişlərinin EİS-də qeydiyyatdan keçirilməsini nəzərdə tutan islahat tədbirində işəgötürənlərin fəal iştirakını göstərir.
Əmək müqaviləsi bildirişlərinin EİS-də qeydiyyatdan keçirilməsi nəticə etibarilə ölkədə əmək hüquqlarının təminatına dövlət nəzarəti mexanizminin təkmilləşməsinə, qeyri-leqal əmək fəaliyyətinin qarşısının alınmasına, əməyin ödənişinin təşkilində mövcud olan problemlərin aradan qaldırılmasına xidmət edir. Bu islahat tədbiri işçilərin əmək və gələcək sosial təminat, habelə gələcəkdə layiqli pensiya təminatına malik olmaq hüquqlarının real təminat forması olmaqla, sosial sığorta haqları və s. daxilolmaların artmasına imkan yaradır”.
Bu, digər tərəfdən, işəgötürən üçün əmək qanunvericiliyində nəzərdə tutulmuş hüquqlarının qorunmasına hüquqi əsas formalaşdırır, onların işçilərlə əmək münasibətlərinin qurulması sahəsində yeni elektron texnologiyalara yiyələnmələrinə səbəb olur.
Həqiqət İSABALAYEVA