“BakuTel 2014” çərçivəsində “Elektron dövlət quruculuğu problemləri” I Respublika elmi-praktiki konfransı keçiriləcək

Ölkənin aparıcı ixtisaslaşdırılmış sərgilərindən biri, eyni zamanda Xəzər və Qafqaz regionlarının telekommunikasiya və informasiya texnologiyaları sahəsində ən böyük sərgisi - “BakuTel” çərçivəsində bir sıra tədbirlərin təşkili planlaşdırılır.

4-5 dekabr tarixlərində keçiriləcək sayca 20-ci Azərbaycan beynəlxalq telekommunikasiya və informasiya texnologiyaları sərgi və konfransı zamanı nəzərdə tutulan tədbirlərdən biri də “Elektron dövlət quruculuğu problemləri” I Respublika elmi-praktiki konfransıdır.

Sözügedən konfransın təşkilatçıları Rabitə və Yüksək Texnologiyalar Nazirliyi, Azərbaycan Milli Elmlər Akademiyası (AMEA) Rəyasət Heyəti və AMEA İnformasiya Texnologiyaları İnstitutudur. Konfransın istiqamətlərinə “E-dövlətin elmi-nəzəri əsasları”; “E-dövlət quruculuğu strategiyaları”; “E-dövlət və e-idarəçilik modelləri”; “E-demokratiya və e-seçki sistemi”; “E-dövlətin ölçülməsi problemləri və rəqəmsal fərqlilik”; “E-dövlətin informasiya təhlükəsizliyi problemləri”; “E-dövlətin perspektiv texnologiyaları”; “E-dövlətin formalaşdırılmasının normativ-hüquqi bazası” daxildir.

Təşkilat Komitəsindən qeyd edilib ki, məruzə həcmi 4 səhifədən (cədvəl, şəkil və ədəbiyyat daxil olmaqla) artıq olmamaq şərti ilə elektron şəkildə “egov@iit.ab.az”, “farhadyusifov@gmail.com” ünvanına təqdim edilməlidir.

Məruzədə məsələnin aktuallığı, qoyuluşu və onun həlli yolları, elmi yenilik və əldə olunmuş nəticələrin praktiki dəyəri əks olunmalıdır.

Şablonu yükləmək olar (55 KB). “Sample_IEEE.doc” şablonunun Azərbaycan dilinə tərcüməsi () (79 KB).
Məruzələrin təqdim edilməsi üçün müəyyənləşdirilmiş son gün 30 oktyabrdır.

Məruzələrin qəbulu haqqında müəlliflərin məlumatlandırılmasının son tarixi isə 15 noyabr müəyyənləşdirilib.

Həqiqət İSABALAYEVA