Sosial şəbəkə yaradıcısı Çin dilində sərbəst danışdığını nümayiş etdirib

"Facebook" sosial şəbəkəsinin rəhbəri Mark Sukerberq Pekində Sinxua Universitetində çıxışı zamanı Çin dilində sərbəst danışdığını nümayiş etdirib. O, çıxışının fraqmentini "Facebook"dakı rəsmi səhifəsində yerləşdirib.

Çin dilinin Mandarin dialektində danışan sosial şəbəkə təsisçisi və baş direktoru oktyabrın 22-də 30 dəqiqəlik sual-cavab sessiyasında iştirak edib.

Onun çıxışına edilən şərhlərdə Çin əsilli istifadəçilər bildiriblər ki, M.Sukerberq həqiqətən Çin dilində sərbəst danışır və hətta onun zarafatlarla zəngin olan çıxışı yaddaqalan olub.

M.Sukerberq Çin dilini 2010-cu ildə öyrənməyə başlamaqla bunu şəxsi təşəbbüs adlandırıb. "Mən həmişə Çin mədəniyyəti ilə maraqlanmışam, dilin öyrənilməsi isə mədəniyyət haqqında daha məlumatlı olmaq üçün əla vasitədir", - o qeyd edib.

Onun sözlərinə görə, sual-cavab sessiyası zamanı daha çox insanların internetə qoşulması, "Internet.org" layihəsi və "Facebook"un ilkin inkişaf mərhələləri müzakirə olunub. O, həmçinin həftənin əvvəlində Sinxua Universitetinin iqtisadiyyat və idarəetmə fakültəsinin Müşahidə Şurasının üzvü seçilib.

Onun həyat yoldaşı Prinsella Çan Çin əsilli ABŞ vətəndaşıdır. M.Sukerberqin sözlərinə görə, o da Çin dilinin Mandarin ləhcəsində danışır.

Məşhur sosial şəbəkə yaradıcısının Çin dilinin öyrənilməsi üzrə səylərinin şəbəkənin biznesinə faydalı olacağı qeyd olunur.

Xatırladaq ki, Çində "Facebook" və ABŞ-ın digər populyar onlayn servislərinə çıxış rəsmən bağlıdır. Lakin şəbəkə rəhbəri ümid edir ki, o, yerli hakimiyyəti öz qərarını dəyişdirməyə inandıra biləcək, - "Lenta" yazır.