“39-cu ACM ICPC Universitet Tələbələrinin Proqramlaşdırma üzrə Beynəlxalq müsabiqəsi”nin yarımfinal mərhələsi və Cənubi Qafqaz Açıq Çempionatı yekunlaşıb

Gürcüstan Respublikasının Tbilisi şəhərində keçirilən “39-cu ACM ICPC Universitet Tələbələrinin Proqramlaşdırma üzrə Beynəlxalq müsabiqəsi”nin yarımfinal mərhələsi və Cənubi Qafqaz Açıq Çempionatı artıq başa çatıb.
 
Çempionatda Azərbaycanın müxtəlif ali təhsil ocaqlarının tələbələri olan gənc proqramçılar, o cümlədən Bakı Ali Neft Məktəbinin (BANM) Proseslərin avtomatlaşdırılması mühəndisliyi ixtisası üzrə təhsil alan tələbələrdən ibarət komandası iştirak edib.
 
 BANM-dan qeyd edilib ki, əvvəlki illərdən fərqli olaraq, bu il Azərbaycanı yarımfinalda daha çox komanda təmsil edib:
 
 “Bu çempionatda Azərbaycanın 11 universitetindən 18 komanda iştirak edib. BANM-ın Proseslərin avtomatlaşdırılması mühəndisliyi ixtisası üzrə təhsil alan tələbələrdən ibarət komandası yarışın sonunda “Fərqlənmə sertifikatı”na layiq görülüb”.
 
Qeyd edək ki, “39-cu ACM ICPC Universitet Tələbələrinin Proqramlaşdırma üzrə Beynəlxalq müsabiqəsi”nin 4/1 final mərhələsi (Azərbaycan Birinciliyi) 9 noyabr 2014-cü il tarixində Qafqaz Universitetində keçirilib. Müsabiqədə 14 universitetdən 57 komanda iştirak edib, 33 komanda yarımfinala vəsiqə qazanıb.
 
 
Həqiqət İSABALAYEVA

---