215 milyon domen adı qeydiyyatdan keçib

Dünyanın ən böyük “DNS” operatoru “Verisign”-ın dərc etdiyi hesabatda qeyd olunub ki, cari ilin ikinci rübündə internetdə domen adlarının artımı birinci rüb ilə müqayisədə 2.5% təşkil edib.

“Verisign” bildirib ki, ikinci rübün sonuna internetin bütün domen zonalarında 215 milyon domen adının qeydiyyatdan keçdiyi hesablanıb. Ötən il ərzində qeydiyyatdan keçmiş domenlərin ümumi bazası 8,6% və ya 16,9 milyon domen artıb.

“.net” və “.com” domen adlarının ümumi bazası 110 milyonu ötüb. Bu göstərici isə ümumi domen bazasının yarısından çoxdur.

Qeydiyyatdan keçmiş domen müddətlərinin artırılması göstəricisi 73,1% təşkil edir, yəni hər 100 qeydiyyatdan keçmiş domendən 73-dən çoxunun müddəti ikinci il üçün artırılır.

Milli coğrafi domen zonalarında hal-hazırda 84,6 milyon domen qeydiyyatdan keçib. Ən böyük artım Braziliya, Avstraliya və İspaniyanın milli domenlərində qeydiyyata alınıb.

Bütövlükdə, ötən rüb ərzində ən böyük milli domenlərin siyahısı cüzi dəyişib. Almaniya “.de” zonası ilə bu siyahıya liderlik edir, sonra Böyük Britaniya (.uk) , Çin (.cn), Avropa Birliyi (.eu) və Rusiya (.ru) gəlir.

---