Elmi İnnovasiyalar Mərkəzi sənayenin inkişafı üzrə Dövlət Proqramının icrası ilə bağlı Tədbirlər planı hazırlayacaq

AMEA Elmi İnnovasiyalar Mərkəzi (EİM) “Azərbaycan Respublikasında sənayenin inkişafına dair 2015-2020-ci illər üçün Dövlət Proqramı”nın icrası ilə bağlı “Tədbirlər planı” hazırlayacaq.

“Tədbirlər planı”nın işlənib hazırlanmasına dair qərar EİM-in Elmi Şurasının növbəti iclasında qəbul edilib.

Mərkəzdən bildirilib ki, EİM-in direktoru, hüquq üzrə fəlsəfə doktoru Azər Namazovun sədrliyi ilə keçirilən iclasda sözügedən proqramın təsdiq edilməsi haqqında respublika prezidentinin sərəncamından irəli gələn vəzifələr müzakirə edilib, fikir mübadiləsi aparılıb.

Qeyd edək ki, Dövlət Proqramının əsas məqsəd və vəzifələrinə elmtutumlu və innovativ istehsalın genişləndirilməsi; qabaqcıl texnologiyaların transferi və mənimsənilməsi istiqamətində tədbirlərin həyata keçirilməsi; innovasiyaların təşviqi, sənayenin inkişaf etdirilməsi istiqamətində özəl sektorun iştirakı ilə son məhsulların istehsalınadək texnoloji zəncirlərin qurulması; yeni regional inkişaf mərkəzlərinin, xüsusi iqtisadi zonaların, prioritet sahələr üzrə ərazi-istehsal klasterlərinin və yerli xammala əsaslanan yeni sənaye müəssisələrinin yaradılması; sənaye və texnologiyalar parklarının və sənaye məhəllələrinin yaradılması; innovasiya fəaliyyətinin genişləndirilməsi üçün dövlət dəstəyinin gücləndirilməsi; sənaye müəssisələrində innovasiyayönlü texnologiyaların tətbiqinin stimullaşdırılması və s. daxildir.

Dövlət Proqramının icra müddətində yüksək texnologiyaların tətbiqi ilə yeni istehsal sahələrinin fəaliyyətə başlaması da prioritetlər sırasındadır.

Bu baxımdan elektron avadanlıqların istehsalının genişləndirilməsi və əczaçılıq məhsullarının istehsalının qurulması imkanları nəzərdən keçirilməli, mövcud sənaye və texnologiyalar parklarının fəaliyyətinin gücləndirilməsi, yeni sənaye parklarının və sənaye məhəllələrinin yaradılması, xüsusi iqtisadi zonaların fəaliyyətə başlaması və regionların sənaye potensialının artırılması istiqamətləri diqqət mərkəzində saxlanılmalıdır.

Həqiqət İSABALAYEVA