“Hitachi” şirkəti bir lövhə ilə 1 TB tutuma malik vinçesterlər istehsal edəcək

“Hitachi Global Storage Technologies” (Hitachi GST) şirkəti 3,5 düym form-faktorda hazırlanan ilk sərt disklərinin tədarükünə başlayır. Sərt disklərin konstruksiyasında 1 terabaytlıq lövhə tətbiq edilib.

“Deskstar” və “CinemaStar” xəttinin “7K1000.D” və “5K1000.B” vinçesterlərində şpindelin fırlanma sürəti müvafiq olaraq 7200 və 5 400 dövr/dəq-dir.

Kompyuterə qoşulma üçün 6 Qbit/s ötürmə sürəti təmin edən “Serial ATA 3.0” interfeysi tətbiq edilir. Buferin tutumu 32 MB-a bərabərdir; daşıyıcıların tutumu 1 TB-a (bir lövhə tətbiq edilir) qədərdir.

“Deskstar 7K1000.D” və “5K1000.B” vinçesterləri stolüstü kompyuterlər üçün nəzərdə tutulub. İstehsalçının bildirdiyinə görə, “7K1000.D” diskləri əvvəlki nəsil qurğularla müqayisədə 15% enerjiyə qənaət edir.

Eyni zamanda “5K1000.B” daşıyıcıları “7K1000.D”-dən enerjiyə 23% daha qənaətcildir. Artıq yeni “Deskstar” modellərin tədarükünə başlanıb.

“CinemaStar” diskləri məişət elektronikası qurğularında, xüsusən rəqəmsal videorekorderlərdə iş üçün optimallaşdırılıb.

---