“Samsung” şirkəti “Galaxy Xcover 3” smartfonunu nümayiş etdirib

“Samsung” şirkəti “Galaxy Xcover 3” smartfonunu təqdim edib. “Android” mobil platforması ilə işləyən aparat 16-20 mart tarixlərində Almaniyada keçiriləcək “CeBIT 2015” sərgisində nümayiş etdiriləcək.
 
"ICTnews" elektron xəbər xidməti “macdigger.ru” saytına istinadən bildirir ki, “Galaxy Xcover 3” smartfonu “MIL-STD 810G” hərbi standartına uyğun hazırlanıb ki, bu da 1,2 metr hündürlükdən yerə düşmə zamanı işləmək qabiliyyətinin saxlanılmasına zəmanət verir. “IP67” sertifikatı toz və sudan müdafiəni göstərir: cihaz 30 dəqiqə ərzində 1 metr dərinliyində suyun altında qala bilir.
 
Smartfon 1.2 QHs takt tezlikli dördnüvəli prosessorla təchiz edilib. Əməli yaddaşın tutumu 1,5 QB, fləş modulun tutumu 8 QB (“microSD” yaddaş kartının hesabına artırmaq mümkündür) təşkil edir.
 
“Galaxy Xcover 3” smartfonu 800×480 piksel təsvir ölçülü 4,5 düymlük ekrana malikdir. Əsas kamera 5 meqapiksel, ön kamera isə 2 meqapiksel təsvir ölçüsünə malikdir. Əsas kamera sualtı çəkiliş rejimi əlçatandır. Modelin qalınlığı 9,95 mm, çəkisi 154 qramdır.
 
Həmçinin rəqəmli kompas, “GPS” və “NFC” modulları, 2200 milliamper/saat tutumunda akkumulyator batareyası quraşdırılıb. Aparat “LTE” şəbəkəsini dəstəkləyir.
 
“Galaxy Xcover 3” smartfonuna “Android 4.4 KitKat” əməliyyat sistemi quraşdırılıb.
 
Emil Hüseynov
 

---