“Samsung” ucuz “Samsung Galaxy Tab 3 V” planşetini buraxıb

“Samsung”un regional nümayəndəliklərindən birinin saytında “Samsung Galaxy Tab 3 V” adlı yeni planşet kompüteri haqda informasiya yerləşdirilib. Qurğu “Galaxy Tab 3 Neo” modelinin yenilənmiş modifikasiyasıdır.
Yeni cihaz 7 düymlük 1024x600 piksel təsvir ölçülü TN ekran, 1.3 QHs takt tezlikli dördnüvəli “Spreadtrum” prosessoru, 1 QB əməli və 8 QB daxili yaddaşla təchiz edilib.

"ICTnews" elektron xəbər xidməti “dailycomm.ru” saytına istinadən bildirir ki, “Samsung Galaxy Tab 3 V” planşeti, həmçinin iki ədəd 2 meqapiksellik kamera, “Wi-Fi 802.11 b/g/n”, “Bluetooth 4.0”, “GPS/QLONASS” və “3G” simsiz kommunikasiya modulları, “FM” radio və 3600 milliamper/saat tutumunda akkumulyator batareyası ilə təchiz edilib. İstehsalçı bildirib ki, qurğu internet sörfinq rejimində 9 saatadək, videoya baxış rejimində isə 8 saatadək avtonom işləyə bilər.





Qurğunun fiziki ölçüləri 193,4x116,4x9,7 mm, çəkisi 322 qramdır. Aparata “Android 4.4” mobil əməliyyat sistemi quraşdırılıb.

“Samsung Galaxy Tab 3 V” modeli Malayziyada təqdim edilib və hələ ki yalnız orada təxminən 135 dollara satılacaq. Daha sonra qurğunu başqa ölkələrdə satın almaq mümkün olacaq.

Emil Hüseynov

---