Azərbaycanda yaxın zamanda “IMEI” kodların qeydiyyat sistemi təkmilləşdiriləcək

Azərbaycan Rabitə və Yüksək Texnologiyalar Nazirliyi yaxın zamanda "IMEI" kodların qeydiyyat sistemini təkmilləşdirmək niyyətindədir.

Rabitə və yüksək texnologiyalar nazirinin birinci müavini İltimas Məmmədovun "ICTnews" xəbər xidmətinə verdiyi məlumata əsasən, ilkin mərhələdə insanların rahat istifadəsi üçün yaradılmış sistemin imkanlarından neqativ məqsədlərlə istifadə edilib.

"Onlar bir şəxsiyyət vəsiqəsi ilə bir neçə telefonu qeydiyyata salırlar. Bunların qarşısını almaq üçün biz hazırda sistemdə təkmilləşdirmə işləri aparmağa hazırlaşırıq və aidiyyəti qurumlarla birgə bu məsələnin incəliklərinə nəzər yetirəcəyik. Bu günlərdə Nazirlər Kabinetinin insanların telefonlarının şəxsiyyət vəsiqəsi vasitəsi ilə qeydiyyata salınması qaydaları sərtləşdirilib və bunu təmin edəcək mobil operatorlara şəbəkələrində zəruri olan avadanlıqların alınması üçün üç ay vaxt verilib", - deyə nazirin birinci müavini qeyd edib.

İ. Məmmədovun sözlərinə əsasən, yeni qaydalara uyğun olaraq, telefon alan şəxs haqda tam bilgilər məlumat bazasına daxil olduqdan sonra ona nömrə ayrılacaq və küçədə, dükanlarda mobil telefon nömrəsi satışı dayandırılacaq.

"Bununla, biz hər bir istifadəçinin mobil cihazının və nömrəsinin öz adına olmasına nail olacağıq və bu, mobil cihazların qeydiyyatının davamı olacaq. Beləliklə, şəbəkə qeyri-qanuni istifadə edilən cihazlardan və nömrələrdən təmizlənmiş olacaq", - deyə İ. Məmmədov bildirib.

Aynur Vəliyeva