Rəqəmli televiziyanın əhatə zonası genişləndirilir

Noyabrın üçüncü ongünlüyünün əvvəlində Rabitə və İnformasiya Texnologiyaları Nazirliyinin "Teleradio" İstehsalat Birliyi Qubada rəqəmli televiziyanı işə salmağı planlaşdırır.

Bu barədə İB-nin baş direktoru Əflatun Şərifov deyib. "Hazırda televiziya qülləsinin tikintisi başa çatıb və rəqəmli ötürücünün işə salınması noyabrın 20-nə planlaşdırılır", - o deyib.

Şərifovun sözlərinə görə, nazirliyin tapşırığına əsasən, həmin tarixə qədər, işğal olunmuş ərazilər istisna olmaqla, ölkənin 85% ərazisinin rəqəmli siqnalla əhatə olunması planlaşdırılır. Hazırda əhatə dairəsində Bakı, Gəncə, Şirvan, Lerik, Lənkəran kimi ərazilər var.

Qeyd edək ki, Naizrliyin iş planına əsasən, rəqəmli televiziyaya tam keçid 2013-cü ildə gözlənilir. Rəqəmli kontentin yayımı MPEG-4 standartı ilə həyata keçirilir. Bunun üçün istifadəçilər dekoder əldə etməlidirlər.

---