O, İT sənayesinin ən zəngin iş adamıdır

Dünyanın ən nüfuzlu və tanınmış iqtisadi nəşrlərindən biri olan "Forbes" növbəti dəfə yüksək texnologiyalar sahəsində ən uğurlu iş adamlarının reytinqini tərtib edib.

"ICTnews" elektron xəbər xidməti "lenta.ru" saytına istinadən bildirir ki, yüksək texnologiyalar sahəsində ən zəngin iş adamlarının "top 100"-nə 51 amerikalı, Asiya-Sakit okean regionundan 33 nümayəndə, 8 avropalı, 2 israilli, 1 latın amerikalı daxil edilib. Reytinqin 100 iştirakçısından 40-ı Kaliforniyada (ABŞ) yaşayır və işləyir.

Bill Qeyts ənənəvi olaraq reytinqin birinci pilləsində bərqərar olub. 2015-ci ildə onun varidatı 79,6 milyard dollar məbləğində qiymətləndirilib.

50 milyard dollar varidata sahib "Oracle" şirkətinin təsisçisi Larri Ellison ikinci pillədə qərarlaşıb.

Üçüncü pillədə Cef Bezos mövqeyini möhkəmləndirib. Bu, bir çoxları üçün gözlənilməz olub. Onun varidatı 48 milyard dollar təşkil edir. İlin əvvəlindən Bezosun varidatı 13 milyard dollar yüksəlib.

Ən zəngin İT şəxslərin ümumi varidatı 842,9 milyard dollara bərabərdir. "Top-100"-də yalnız 7 qadın yer alıb. "Snapchat"ın qurucusu və baş direktoru Evan Şpiqel reytinqdə ən gənc iş adamıdır.

Ən yaşlı iş adamı isə "Intel" korporasiyasının həmtəsisçisi Qordon Murdur, onun 86 yaşı var.

Emil Hüseynov