Türkiyə universiteti ilə birgə texnoparkın yaradılması müzakirə edilib

 Türkiyənin Orta Doğu Texniki Universiteti (ODTÜ)  ilə Azərbaycan Dövlət İqtisad Universiteti (UNEC) birgə texnopark yaradılmasını nəzərdən keçirirlər. Bununla bağlı məsələlər UNEC-də keçirilən görüşdə müzakirə edilib.
 
UNEC-dən bildirilib ki, Türkiyənin Orta Doğu Texniki Universiteti Texnoparkının direktor müavini Tolqa Özpolatla keçirilən görüşdə UNEC-in rektoru, professor Ədalət Muradovla hər iki universitet arasındakı mövcud əlaqələrdən və gələcək əməkdaşlıq imkanlarından danışıb. Ə.Muradov bildirib ki, dünya universitetləri səviyyəsinə yüksəlmək niyyətində olan UNEC, Türkiyə ali məktəbləri sırasında özünəməxsus yeri olan və geniş texnopark təcrübəsinə malik ODTÜ ilə əməkdaşlıqda maraqlıdır.
 
 
T.Özpolat ODTÜ-nün otuz beş illik tarixi olan texnoparkı haqda məlumat verərək bildirib ki, burada 304 şirkət fəaliyyət göstərir. Bu gün ODTÜ-nün texnoparkının minə yaxın layihəsinin reallaşmasından söz açan qonaq, UNEC-lə əməkdaşlıqdan məmnun qaldığını bildirib.
 
 
Görüşdə birgə texnoparkın yaradılmasına dair müzakirələr aparılıb. Sonra UNEC-in Texnologiya Transfer Mərkəzinin (TTN) direktoru Aydın Hüseynov TTN haqda geniş təqdimatla çıxış edib. Qonağa UNEC-də on ay əvvəl yaradılan mərkəzin gördüyü işlərdən danışıb.
 
 
Görüşün sonunda T.Özpolat UNEC-in İnnovativ Biznes İnkubatorunu ziyarət edərək, startaplarla tanış olub, gənclərə öz tövsiyələrini verib.
 
 
Həqiqət İSABALAYEVA

---