Əmək müqaviləsi və iş yerinə dair arayış elektron xidmətlərinə tələbat artıb

Cari ilin sentyabr ayında əhali Əmək və Əhalinin Sosial Müdafiəsi Nazirliyinin (ƏƏSMN) “Elektron hökumət” portalı üzərindən təqdim etdiyi elektron xidmətlərdən ümumilikdə 236714 dəfə faydalanıb ki, bu da portaldakı bütün e-xidmətlərdən ümumi istifadənin (767616 ədəd)  30,8 faizini təşkil edir.
 
Ötən ay nazirliyin e-xidmətlərindən yararlananların sayı əvvəlki avqust ayı ilə müqayisədə 58 faizə yaxın artıb. Nazirlikdən qeyd edilib ki, sentyabr ayında ƏƏSMN-in  “Əmək müqaviləsi bildirişlərinin qeydiyyata alınması və bu barədə işəgötürənə məlumatın verilməsi” e-xidməti 130352 ədəd, “Əmək müqaviləsi bildirişləri barədə məlumatların işçilər tərəfindən əldə edilməsi” e-xidməti 81118 ədəd istifadə sayı ilə əhalinin ən çox faydalandığı e-xidmətlər sırasında ilk üçlükdə qərarlaşıblar.
 
Nazirliyin “İş yerinə dair arayış” e-xidməti də həmin sırada yer alıb və  ötən ay “E-Hökumət” portalında 9 növ e-arayış xidmətindən cəmi istifadənin 54 faizi, yəni 22856-ı məhz ƏƏSMN-in bu e-xidmətinə aid olub.
 
 
Ümumilikdə cari ilin 9 ayında əhali ƏƏSMN-in  bütün elektron xidmətlərindən 1 milyon 660 min 824 dəfə istifadə edib ki, bu da qeyd olunan dövrdə “E- hökumət” portalı üzrə ümumi istifadə sayının 17,5 faizini təşkil edir. 
 
 
 
Həqiqət İSABALAYEVA

---