Daha bir elektron xidmətin inzibati reqlamentində dəyişikliklər edildi

Dövlət Miqrasiya Xidməti “Azərbaycan Respublikasında müvəqqəti yaşamaq üçün icazənin alınması (müddətinin uzadılması) üçün müraciətin və sənədlərin qəbulu” elektron xidməti üzrə inzibati reqlamentdə dəyişikliklər edib.

“ICTnews” elektron xəbər xidmətinin məlumatına görə, inzibati reqlamentin “iqtisadiyyat, sənaye, müdafiə, elm, mədəniyyət, idman və digər sahələr üzrə yüksək səviyyəli mütəxəssis olan əcnəbiləri və vətəndaşlığı olmayan şəxsləri Azərbaycan Respublikasına dəvət edən idarə, müəssisə və təşkilatın əsaslandırılmış vəsatəti;” məzmunlu 2.6.1.6-cı yarımbəndində “müdafiə” sözü “hərbi” sözü ilə əvəzlənib.

Bununla yanaşı, reqlamentə 1 nömrəli Əlavənin “iqtisadiyyat, sənaye, müdafiə, elm, mədəniyyət, idman və digər sahələr üzrə yüksək səviyyəli mütəxəssis olduqda” məzmunlu 11.4-cü bəndində “müdafiə” sözü “hərbi” sözü ilə əvəz edilib.

CAHANGİR