QKDK lisenziyalaşdırma prosesinin avtomatlaşdırılması istiqamətində növbəti addımlar atacaq

Qiymətli Kağızlar üzrə Dövlət Komitəsi (QKDK) lisenziyalaşdırma prosesinin sadələşdirilməsi və avtomatlaşdırılması istiqamətində növbəti addımlar atacaq.
 
“ICTnews.az” elektron xəbər xidmətinin məlumatına görə, bununla bağlı qərar komitədə keçirilən son kollegiya iclasında qəbul olunub.
 
İclasda QKDK sədri Rüfət Aslanlı lisenziyalaşdırma prosesinin sadələşdirilməsi və avtomatlaşdırılması məsələsinə toxunaraq proseslərin qısa müddət ərzində və ən əsası, qiymətli kağızlar bazarı institutlarının fəaliyyətinə təsir etmədən tamamlanması üçün İqtisadiyyat və Sənaye Nazirliyi və “ASAN xidmət” ilə birgə işlərin aparılmasına dair müvafiq göstərişlərini verib.
 
 
R.Aslanlı ölkədə sahibkarlığın inkişafının stimullaşdırılması məqsədilə Azərbaycan Respublikası Prezidenti tərəfindən edilmiş müvafiq təşəbbüsləri inqilabi qərarlar adlandırıb və hökumətin xüsusilə, qeyri-neft sektorunda sahibkarlığın inkişafı ilə bağlı ardıcıl fəaliyyətinin davamı kimi  səciyyələndirib. Komitə sədri mövcud makroiqtisadi situasiya fonunda atılmış bu addımların iqtisadi artımın təmin edilməsinə əhəmiyyətli töhfə verə biləcəyini qeyd edib.
 
 
İclasın davamında “Sahibkarlıq fəaliyyətinin xüsusi razılıq (lisenziya) tələb olunan növlərinin sayının azaldılması, xüsusi razılıq (lisenziya) verilməsi prosedurlarının sadələşdirilməsi və şəffaflığının təmin edilməsi haqqında” və “Sahibkarlıq sahəsində aparılan yoxlamaların dayandırılması haqqında Azərbaycan Respublikasının Qanunu”nun təsdiq edilməsi barədə” Azərbaycan Respublikası Prezidentinin müvafiq fərmanlarının icrası ilə bağlı görülməli işlər və digər prioritet məsələlərə dair müzakirələr aparılıb və sözügedən istiqamətlər üzrə QKDK sədri tərəfindən konkret  tapşırıqlar verilib.
 
 
SEYMUR

---