4D çap texnologiyası təqdim edilib

ABŞ-ın Harvard Universitetində çalışan alimlərdən ibarət qrup 3D printerdə çap edilən obyektlərin formasını dəyişdirmək üçün proqramlaşdırmağa imkan verən texnologiya yaradıblar. Bu halda dəyişikliklər dördüncü ölçü adlandırılan zaman kəsiyində baş verdiyinə görə texnologiya 4D çap adlandırılıb.
 
Təbiətdə artıq mövcud olan mexanizmlər, məsələn, xarici stimullardan asılı olaraq öz formasını dəyişdirmək qabiliyyətinə malik bitkilər alimləri 4D çap texnologiyasını yaratmağa ilhamlandırıb.
 
"ICTnews" Elektron Xəbər Xidməti "rusbase.com" saytına istinadən yazır ki, 3D printerdə mürəkkəb əvəzinə sellüloz liflərindən ibarət olan hidrogeldən istifadə olunur. Çapdan sonra hidrogel dərhal bərkiyir.
 
Amma belə hidrogeldən çap edilmiş struktur suya salındıqda sellüloz liflər qeyri-bərabər şəkildə şişərək bütün obyektin formasını dəyişdirir.
 
Alimlər tərəfindən hazırlanmış riyazi model çap edilmiş strukturların suda  istənilən formaya çevrilməsi üçün sellüloz lifləri gel üzərinə necə yerləşdirməyi əvvəlcədən planlaşdırmağa imkan verir.
 
Emil Hüseynov
 
 
 

---