Yeni virus “Skype” istifadəçilərinin danışıqlarını yazır

"Palo Alto Networks" şirkətinin mütəxəssisləri tərəfindən verilmiş məlumata əsasən, "T9000" adlı yeni virus "Skype" istifadəçilərin şəxsi məlumatlarını və yazışmalarına müdaxilə edir.

"ICTnews" Elektron Xəbər Xidməti "gazeta.ru" saytına istinadən yazır ki, "Kaspersky", "Norton", "AVG" kimi ən populyar antivirus proqramları bu zərərli proqram təminatını aşkar etmir.

"Sözügedən virusun ilkin funksiyası istifadəçi barəsində məlumat toplamaqdan ibarətdir. Proqram video görüntülü danışıq zamanı mütəmadi olaraq istifadəçinin şəkillərini çəkib yadda saxlayır, həmçinin istifadəçilərin danışığını yazır", – "Palo Alto"nun  mütəxəssisi deyib.

Virusun modullarından biri "Skype"dan məlumatların toplanılmasına yönəlib və işə salınma anında «explorer.exe wants to use Skype» mesajını göstərərək istifadəçidən onun izlənilməsinə razılıq verməyi məcbur edir. Razılıq verildikdə sözügedən virus yazışmanı, həmçinin səs yazılarını və video görüntülü danışığı yazır.
 
"Rich Text Format" ("RTF") formatında olan faylların işə salınması nəticəsində kompüter virusa yoluxur. Bundan sonra troyan virusu çoxpilləli quraşdırma prosesinə başlayır ki, hər addımda antivirus proqramının mövcudluğunu yoxlayır.

"Skype" rəsmisi bildirib ki, hazırda yeni virus və onun potensial zərəri haqda araşdırma aparılır.

Emil Hüseynov

---