Avropada rəqəmli pul kisələrinə tələbat artıb

“Aimia” analitik şirkətinin yeni tədqiqatına əsasən, Avropada istehlakçıların rəqəmli pul kisələrinə tələbatı artır. Belə ki, avropalıların 31%-i öz mobil qurğusunda rəqəmli pul kisəsindən istifadə edirlər ki, bu da ötən ilin göstəricisi ilə müqayisədə 5% yüksəkdir.

“ICTnews” Elektron Xəbər Xidməti “psm7/com” saytına istinadən yazır ki, İtaliya rəqəmli pul kisəsindən istifadə edənlərin sayına görə liderdir: adıçəkilən ölkədə rəyi soruşulanların 47%-i mobil pul kisəsindən istifadə edir. Növbəti pillədə 35% göstəriciyə malik İspaniya gəlir. Almaniya (19%) və Fransada (22%) rəqəmli pul kisələrinin nüfuzetmə səviyyəsi çox aşağıdır və ötən illə müqayisədə bu göstərici, demək olar, dəyişməyib. Böyük Britaniyada respondentlərin 29%-i rəqəmli pul kisələrinə müsbət fikir bildirib.

“Aimia” şirkətinin sorğusuna əsasən, mobil pul kisələri 65% halda  vauçer, loyallıq kartlarının (63%) saxlanılması və nağdsız ödənişlərin (56%) edilməsi üçün istifadə olunur.

Rəqəmli pul kisələrinin geniş yayılmasına əsas maneə fərdi məlumatların təhlükəsizlik məsələsidir. Avropada istehlakçıların 38%-i məlumatların təhlükəsizliyindən narahatçılıq keçirirlər və bu səbəbdən, ehtimal ki, yaxın gələcəkdə rəqəmli pul kisəsindən istifadə etməyəcəklər.

Emil Hüseynov

---