“m.e.” breloku qurğuların səsinin keyfiyyətini yaxşılaşdıracaq

Yüksək keyfiyyətdə musiqi dinləməyi sevənlər smartfon, pleyer və kompüterlərin səsini yaxşılaşdırmaq üçün imkanın olmasını arzulayırlar. Audiomühəndis və peşəkar musiqiçi Con Kaşa uzun müddət məhz bunu arzulayıb və nəticədə səsin keyfiyyətini yaxşılaşdıra bilən qurğu yaratmağa nail olub.

“ICTnews” Elektron Xəbər Xidməti “4PDA www.4pda.ru” resursuna istinadən yazır ki, “m.e.” adlanan qurğu lazım olduqda açar topasına asmağın mümkün olduğu adi brelok şəklindədir. Səs mənbəyi və qulaqcıq və ya kolonkalar arasında vasitəçi kimi çıxış edən aksessuar istifadəçi peşəkar avadanlıqlı səsyazma studiyasında olduğu kimi kənar səs-küy yaratmadan səsi ucaldır, ümumi keyfiyyəti artırır və bütün notları dinləməyə imkan verir.  

Bildirilir ki, texniki xüsusiyyətləri barədə məlumat verilməyən qurğunun əsasını kiçik çip təşkil edir. Bundan başqa, bir dəfə doldurulan enerji 80 saat musiqi dinləməyə kifayət edir. Enerji USB ilə 15 dəqiqə ərzində toplanır. Qurğunun metaldan düzəldilən korpusu üzərində qoşulma və söndürmə üçün nəzərdə tutulan yalnız bir düymə var. 

“m.e.” brelokunu “Kickstarter” saytında 148 dollara sifariş etmək mümkündür. Qiymətə iki qurğu daxildir (ikincisi 50 faiz endirimlə təklif olunur).

Nizam Nuriyev

---