“Samsung” şirkəti yaddaş istehsalı üzrə dünyada ən böyük müəssisə açır

“Samsung” şirkəti “DDR3 DRAM” və “NAND Flash” yaddaş mikroçiplərinin istehsalı üçün nəzərdə tutulmuş “Line-16” müəssisəsinin işə salınması haqqında məlumat verib.

12 mərtəbəli zavodun tikintisi 2010-cu ilin mayında başlanıb , avadanlığın quraşdırılması isə 2011-ci ilin may ayında başa çatıb.

Layihəyə qoyulan investisiyalar təxminən 10 milyard dollar təşkil edib. “Samsung” şirkəti qeyd edib ki, “Line-16” ən böyük müəssisəsidir.

Zavodda artıq 20 nanometr texnologiya ilə hazırlanan 2 Qbit tutumlu “DDR3 DRAM” mikroçiplərinin kütləvi istehsalı həyata keçirilib. İstehsalçı iddia edir ki, bu məmulatlar 30 nanometr texnologiya ilə hazırlananlar ilə müqayisədə 40% daha aşağı enerji istehlakı ilə səciyyələnirlər.

Bundan başqa, daha incə texnoloji prosesin tətbiqi məhsuldarlığı 50% yüksəltməyə imkan verib.

İlin sonuna kimi 20 nanometr texnologiya ilə hazırlanan 4 Qbit tutumlu “DDR3 DRAM” mikroçiplərinin istehsalı öyrəniləcək. Belə məmulatlar 4, 8, 16 və 32 QB tutumlu yaddaş modullarında tətbiq olunacaq.

---