Yumşaq materiallardan robot hazırlanıb
Varşava universitetinin alimləri tərəfindən yaradılmış bir neçə santimetr ölçüsündə olan robot tırtılın hərəkətlərini dəqiq icra edir.
“ICTnews” Elektron Xəbər Xidməti
hi-news.ru saytına istinadən yazır ki, polşalı mühəndislər tərəfindən yaradılmış robot yumşaq materiallardan hazırlanıb və ölçüsü o qədər kiçikdir ki, barmağın ucunda yerləşə bilər. Karkas və robotun hərəkət modelinin hazırlanmasında yalnız mühəndislər deyil, həm də fizioloq və bioloqlar iştirak ediblər. Belə əməkdaşlıq nəticəsində tırtılın hərəkətini dəqiq canlandırmaq mümkün olub və ona yalnız irəli-geri sürünmək deyil, həmçinin dönmək və maneələri dəf etmək öyrədilib. Bundan başqa, kiçik ölçülü robot öz çəkisindən 10 dəfə ağır yük daşımaq qabiliyyətinə malikdir.
Robotun karkasının əsasını plastik materialdan hazırlanmış yumşaq konstruksiyalar təşkil edib.
Layihənin direktoru Pyotr Vaşilçjek öz ixtirası haqda aşağıdakıları deyib:
"Yumşaq materiallardan hazırlanmış robotlar robot texnikasının inkişafında yeni mərhələ ola bilər. Gələcəkdə bu cür texnologiyalar qidalanma elementlərinin qurulmasını yüngülləşdirə bilər və robotların hərəkət funksionallığını xeyli genişləndirə bilər. Hazırda biz bu yolun başlanğıcındayıq".
Emil Hüseynov