Rabitəçilərin sosial vəziyyəti daha da yaxşılaşdırılır

Azərbaycan Respublikasının Prezidenti cənab İlham Əliyev tərəfindən ölkədə yoxsulluğun azaldılması, əhalinin sosial rifah halının yaxşılaşdırılması və sosial müdafiəsinin gücləndirilməsi ilə bağlı verdiyi tapşırıqlara uyğun olaraq, cari ilin sentyabr ayının 1-dən etibarən Rabitə və Yüksək Texnologiyalar Nazirliyinin strukturunda çalışan işçilərin ştat üzrə aylıq vəzifə maaşları qaldırılmışdır.

“Azərbaycan Respublikasının Rabitə və Yüksək Texnologiyalar Nazirliyi haqqında Əsasnamə”nin 5.5.7-ci yarımbəndini rəhbər tutaraq rabitə birlik və  müəssisələrində işləyənlərin əmək haqları 10 faizədək  artırılmışdır.

Əmək haqlarının artırılmasında üstünlük, əsasən, regionlar və vətəndaşlara birbaşa xidmət göstərən müəssisələrin əməkdaşlarına verilib. Belə ki, artım “Aztelekom” MMC-nin baş idarəsi üzrə 5 %, digər bütün müəssisələri üzrə 10%, “Azərpoçt” MMC-nin (aparat istisna olmaqla) “Azərekspresspoçt” Rabitə  Müəssisəsi üzrə 5%, digər bütün müəssisələri üzrə 10%,  “Bakı Telefon Rabitəsi” İstehsalat Birliyinin Xətai, Yasamal, Nizami, Sabunçu, Qaradağ Telefon qovşaqları 5%, Xəzər Telefon Qovşağı və Bakı Avtomat Telefon Qovşağı üzrə 10%, “Teleradio” İstehsalat Birliyi üzrə 10%, “Azərmarka” MMC üzrə 5%, “Hərbiləşdirilmiş Mühafizə İdarəsi” MMC üzrə 10 % təşkil edib.

Bundan başqa,  nazirliyin strukturuna daxil olan qurumlar və strukturuna daxil olmayan tabeliyindəki qurumlar (dövlət büdcəsindən maliyyələşən təşkilatlar istisna olmaqla) tərəfindən bəzi işçilərin aylıq əməkhaqqının ölkə üzrə yaşayış minimumu səviyyəsinə çatdırılması təmin edilmişdir.

Qeyd edək ki, 2016-cı ilin yanvar-iyun aylarında ölkə iqtisadiyyatında muzdla çalışan işçilərin orta aylıq nominal əməkhaqqı 488,1 manat təşkil edir.

İqtisadiyyatın digər sahələri ilə müqayisədə informasiya və rabitə sahələrində orta aylıq nominal əməkhaqqı daha yüksəkdir. Belə ki, hazırda sektor üzrə orta aylıq əməkhaqqı 746.8 manatdır. 

---