Ölkəmiz internet istifadəçilərinin sayına görə dünya üzrə 36-cı yerdə qərarlaşıb

Beynəlxalq Telekommunikasiya İttifaqının (BTİ) "The State of Broadband" adlı yeni hesabatında Azərbaycanın ayrı-ayrı göstəricilər üzrə mövqeyi yüksəlib.
 
Belə ki, ölkəmiz reytinq cədvəlində hər 100 nəfərə düşən  internet istifadəçilərinin sayına görə 63-cü yerdən 36-cı yerə yüksəlib. Hesabata əsasən, ölkədə hər 100 nəfərdən 77-si  internet istifadəçisidir.
 
 
Hər 100 nəfərə düşən genişzolaqlı internet istifadəçilərinin sayına görə isə Azərbaycan reytinq cədvəlində 53-cü pillədə qərarlaşıb. Hazırda ölkədə hər 100 nəfərə 19.76  sabit genişzolaqlı internet abunəçisi düşür.

Azərbaycan bu göstərici üzrə Rusiya, Türkiyə, İran, Qazaxıstan və Ermənistanı geridə qoyub.
Məlumat üçün bildirək ki, sözügedən reytinqdə Monako (hər 100 nəfərə 47.47 istifadəçi) liderdir. Sonrakı yerləri İsveçrə, Lixtenşteyn, Danimarka, Niderland bölüşür.
 
Bundan başqa,  ölkəmiz mobil genişzolaqlı internet abunəçilərinin sayına görə də mövqeyini yaxşılaşdırıb. Belə ki, Azərbaycan dünya üzrə reytinqdə 60-cı yeri tutub. Müqayisə üçün qeyd edək ki, əvvəlki reytinqdə ölkəmiz hər 100 nəfərə düşən 46.8 abunəçi ilə 68-ci yerdə qərarlaşmışdı.

---