“Sharp” maye-kristal televizor ekranlarının istehsalını dayandıracaq
Yaponiyanın “Sharp” şirkəti Cənubi Koreyanın “Samsung Electronics” istehsalçısı üçün maye-kristal televizor ekranlarının istehsalını dayandıracaq.
“ICTnews” Elektron Xəbər Xidməti “
DailyComm” resursuna istinadən yazır ki, bu, dünyada 65 düymlü displeylərə tələbatın artmasına səbəb ola bilər.
Məlumata görə, əvvəlcə “Samsung” 2017-ci ildə “Sharp”dan 4,5 milyon televizor paneli almağı planlaşdırıb və sifarişin əksər hissəsini diaqonal üzrə 40, 60 və 70 düym ölçülü panellər təşkil edib. Lakin yanvarda tədarükün dayandırılacağı gözlənilir.
Bir müddət əvvəl “Samsung Electronics”in “Sharp”ın ona məxsus bütün səhmlərini Yaponiya şirkəti Tayvanın “Foxconn” elektronika istehsalçısı ilə birləşdikdən sonra satması bildirilib.
Qeyd olunur ki, 2017-ci ilin əvvəlində iriölçülü “LCD” panellər arasında daha çox 65 düymlü modellər bahalaşıb (10 dollar). Bu seqmentin cari ildə əsas seqmentə çevrilməsi gözlənilir.
2016-cı ildə dünyada 7,5 milyon 65 düymlü maye-kristal displey buraxılıb, 2017-ci ildə isə 10-12 milyon ədədədək artım proqnozlaşdırılır. Tələbatın artması “Samsung Display”, “LG Display”, “Innolux”, “AU Optronics” və “Nanjing CEC Panda LCD Technology” kimi istehsalçılara sərf edir.
Nizam Nuriyev