“Android” mobil əməliyyat sisteminin ən populyar versiyası məlum olub

“Marshmallow 6.0” əməliyyat sistemi ilk dəfə “Android” sistemi bazarında ən geniş yayılmış platforma adına layiq görülüb. Bu haqda iyunun 5-nə olan yeni statistikada qeyd edilib.

“ICTnews” Elektron Xəbər Xidməti “3dnews.ru” saytına istinadən yazır ki, hazırda “Marshmallow 6.0” versiyasının bazar payı 31,2 % təşkil edir. Son ayda bu göstərici dəyişməyib. Amma “Lollipop” (5.0 və 5.1) versiyasının bazar payı azalaraq 30,8 % təşkil edib. 18,1% bazar payına malik “KitKat 4.4” versiyası ilk üçlükdə yerləşib.

Eyni zamanda “Nougat 7.0” və “Nougat 7.1” versiyalarının mövqeyi möhkəmlənir: bir ayda bu versiyaların ümumi bazar ayı 7.1-dən 9,5%-dək artıb.

“IDC” ekspertlərinin fikrincə, 2017-ci ildə dünyada 1,52 milyard smartfon tədarük ediləcək. Analitiklərin proqnozuna görə,  "ağıllı" mobil telefonların tədarük həcminin 85,1%-i “Android” əməliyyat sisteminin idarəetməsi ilə işləyəcək.

Emil Hüseynov

---