Yeni “Android” versiyası ilk dəfə “Google” reytinqinə daxil olub
“Google” şirkəti “Android” əməliyyat sisteminin müxtəlif versiyalarının yayılmasını xarakterizə edən rəsmi statistikanı dərc etməkdə davam edir. Şirkətin məlumatlarında ilk dəfə yeni “Android 8.0 Oreo” versiyası yer alıb.
“ICTnews” Elektron Xəbər Xidməti “
DailyComm” resursuna istinadən yazır ki, “Android 8.0 Oreo” oktyabrın 2-də başa çatan hesabat dövrünün yeddi gününün yekunları üzrə “Android” sistemli qurğuların 0,2 faizində quraşdırılıb. Statistikada əməliyyat sisteminin 0,1 faizlik paya malik versiyaları sadalanıb.
Gözlənilir ki, oktyabrın 4-nə nəzərdə tutulan yeni nəsil “Google Pixel” smartfonları buraxıldıqdan sonra “Oreo” versiyasının iştirak göstəricisi daha sürətlə artacaq.
Məlumata görə, “Google” mobil platformasının ən geniş yayılmış modifikasiyası son “Google” reytinqində 32 faizlik bazar payına sahib çıxan “6.0 Marshmallow” olaraq qalır.
Populyarlığına görə ikinci yerdə “Android” elektronikası bazarında 27,7 faizlik payla “Lollipop” (4.1-4.2) versiyası qərarlaşıb. Liderlər üçlüyünü 17,8 faizlik nəticə ilə “Android Nougat 7.0-7.1” tamamlayır ki, bu da bir ay əvvəldən 2 faiz bənd çoxdur. Sonrakı yerləri “KitKat” (14,5 faiz) və “Jelly Bean” (6,6 faiz) tutub.
Əməliyyat sisteminin köhnəlmiş “Android Gingerbread” və “Ice Cream Sandwich” versiyaları “Android” əməliyyat sisteminin idarəetməsi ilə işləyən qurğuların təxminən 0,6 faizində quraşdırılıb.
Nizam Nuriyev