“Google Chrome” istifadəçilərinin sayı 200 milyonu ötüb

“Google” şirkətinin baş direktoru Larri Peyc “Chrome” səyyahı istifadəçilərinin sayı ilə bağlı statistikanı elan edib.

2010-cu ilin dekabr ayında təxminən 120 milyon istifadəçi “Google” şirkətinin veb-səyyahına üstünlük verib. 2011-ci ilin may ayında bu göstərici 160 milyona qədər artıb. Cənab Peycin sözlərinə görə, hal-hazırda “Chrome” səyyahı ilə 200 milyondan çox istifadəçi işləyir.

“Net Applications” analitik şirkətinin hesablamalarına əsasən, sentyabr ayında “Chrome” səyyahı bazarın 16,2%-ni tutub. 1 il ərzində veb-səyyah bazar payını 2 dəfə artırıb. Analitiklər “Chrome” səyyahının 2012-ci ildə bazarın 20%-ni tuta biləcəyini proqnozlaşdırırlar.

“Chrome” səyyahı yalnız “İnternet Explorer” və “Firefox” səyyahlarından geri qalır. Onların payı müvafiq olaraq 54,4 və 22,5%-ə bərabərdir.

---