Avropa İttifaqı və ABŞ birgə kibertəlimlər keçirib

Avropanın 16 ölkəsinin yüzə yaxın kompyuter üzrə eksperti Avropa İttifaqının müxtəlif agentliklərinə, eləcə də xüsusi əhəmiyyət kəsb edən infrastruktur obyektlərinə, o cümlədən elektrik stansiyalarına edilən bir sıra ciddi kiberhücumları birlikdə dəf ediblər.

Bu, kibertəhlükəsizlik üzrə ABŞ və Avropa İttifaqı arasında ilk dəfə keçirilən “Cyber Atlantic 2011” təlimlərinin ssenarisi olub.

“Müdafiə olunanlar” iki ssenari üzrə məşq ediblər: birincisi Avropa İttifaqına üzv olan ölkələrdən və aidiyyəti dövlət qurumlarından məxfi məlumatların alınmasına və dərc edilməsinə yönələn “APT” (advanced persistent threat) hücumlara yönəlib.

Təlimlərin bu hissəsində Avropanın “ENİSA” (Europe network and information security agency) agentliyinin İT mütəxəssisləri reallıqda baş verə biləcək hücumu simulyasiya ediblər.

İkinci ssenari enerji təminatı obyektlərinin işi üçün istifadə olunan Avropanın “SCADA” sənaye sistemlərinin miqyaslı şəkildə sındırılmasına istiqamətlənib. Hücumların bu növü hələ ki real şəkildə yaradılmayıb, lakin onun “Stuxnet” və “Duqu” viruslarının yayılması fonunda yaranması ehtimalı çox böyükdür.

Təlimlərdə ümumilikdə Aİ-in 20-dən çox ölkəsi, habelə ABŞ Daxili Təhlükəsizlik İdarəsinin nümayəndələri iştirak ediblər. Bundan başqa, təlimlər çərçivəsində Aİ və ABŞ-ın bu sahədə qarşılıqlı fəaliyyətinin üsulları üzrə məşqlər edilib.

---