“Fujitsu” superkompyuterinin məhsuldarlığı 20 petaflopsu ötür

“Fujitsu” şirkəti yanvar ayında nəzəri cəhətdən rekord sürətə malik yeni nəsil “PrimeHPC FX10” hesablayıcı kompleksinin tədarükünə başlayacaq. “PrimeHPC FX10” kompleksi maksimal konfiqurasiyada 98304 hesablama qovşağı ilə 1024 dirəyi birləşdirə bilər.

Onların hər biri 1,85 QHz takt tezlikli 16 nüvəli “SPARC64 IXfx” prosessorundan, həmçinin 32 və ya 64 Qb əməli yaddaşdan ibarətdir. Qovşaqlar arasında verilənlər mübadiləsi 2×5 Qb/s ötürmə sürəti ilə həyata keçirilir.

Çip və əlaqələndirici proqram təminatı da daxil olmaqla sistemin bütün komponentləri “Fujitsu” mütəxəssisləri tərəfindən hazırlanıb.

1024 dirəkdən istifadə zamanı “PrimeHPC FX10” kompleksinin nəzəri məhsuldarlığı 23,2 petaflops təşkil edir, yəni 1 saniyə ərzində sistem üzən vergüllə 23,2 kvadrillion əməliyyat yerinə yetirməyə qadirdir.

Müqayisə üçün: bugünkü gün üçün istifadə olunan superkompyuterlərdən ən güclüsü olan Yaponiyanın “K Computer” kompleksi 10,5 petaflops sürətə malikdir.

“PrimeHPC FX10” kompleksinin 1 dirəyinin qiyməti təxminən 640 min dollar təşkil edəcək. Beləliklə, kompleks maksimal konfiqurasiyada sifarişçilərə demək olar ki, 660 milyon dollara başa gələcək.

---