Vergilər Nazirliyi elektron xidmətləri genişləndirəcək

Vergilər Nazirliyi 2011-2012-ci illər üçün elektron xidmətlərin göstərilməsi tədbirləri üzrə İş planını təsdiq edib. Bu barədə Vergilər Nazirliyindən bildirilib. İş planı tədbirlərin 5 blok üzrə keçirilməsini nəzərdə tutur. Birinci bloka Vergilər Nazirliyinin saytında "elektron xidmətlər”in yaradılması və təkmilləşdirilməsi daxildir. 2011-ci il dekabrın sonuna kimi bu istiqamətdə www.e-taxes.gov.az portalının təkmilləşdirilməsi və bu portal vasitəsi ilə göstərilən elektron xidmətlər spektrinin genişləndirilməsi planlaşdırılır. 2011-2012-ci illərdə Vergilər Nazirliyi vergi orqanları tərəfindən vergi bəyannamələrinin doldurulması sisteminin tətbiqi sahəsində beynəlxalq təcrübəni öyrənməyi və ilkin mərhələdə ƏDV ödəyiciləri üçün bu sistemi (Pre-filled tax return) tətbiq etməyi planlaşdırır.
İkinci blok müxtəlif bəyanatların, blankların elektron formada yerləşdirilməsinə, vətəndaşlar və vergi ödəyiciləri tərəfindən elektron xidmətlərin maneəsiz istifadəsinə imkan yaradan sistemin tətbiqini nəzərdə tutur. 2011-ci il iyulun sonuna kimi bu istiqamətdə vergi bəyannamələrini, hesabatları, arayışları onlayn rejimdə təqdim etməyə; elektron ödəniş sistemini yaratmaq və təkmilləşdirməyə (2011-2012-ci illər); e-audit sisteminin tətbiqi ilə əlaqədar qanunvericiliyin təkmilləşdirilməsi üzrə təkliflərin (2011-2012-ci illər) hazırlanmasını; elektron ticarət üzərində vergi nəzarətinin təşkilatı üzrə təkliflərin hazırlanmasına (2011-2012-ci il) imkan yaradacaq elektron sistemin yaradılmasını nəzərdə tutur.
Üçüncü blok vətəndaşlardan və vergi ödəyicilərindən skanerdən çıxarılmış sənədlərin elektron formada qəbulunu, bu sənədlərin vergi orqanları tərəfindən alınması haqqında xəbərdarlığı daxil edir. 2011-ci il iyulun sonuna kimi bu istiqamətdə İnternet Vergi İdarəsi vasitəsi ilə vətəndaşların müraciətlərinin qəbulu, cavabın elektron formatda verilməsi üzrə sistemin yaradılması; vergi borcları (2011-ci il dekabrın sonuna kimi) sahəsində elektron xidmətlərin genişləndirilməsi; veb-kamera (2011-2012-ci illər) vasitəsilə vətəndaşların qəbulu sisteminin təşkil edilməsi planlaşdırılır.
Dördüncü bloka dövlət rüsumlarının və başqa ödənişlərin onlayn rejimdə ödənişinin təşkilini, fərdi informasiya təhlükəsizliyinin təmin olunmasını nəzərdə tutur. 2011-ci il avqustun sonuna kimi bu istiqamətdə elektron imzanın tətbiqi ilə İnternet Vergi İdarəsi vasitəsi ilə əməliyyatların keçirilməsi imkanlarının təmin edilməsi; Vergilər Nazirliyinin saytı vasitəsilə vergi və rüsumların ödənişi üçün imkanların yaradılması (2011-ci il dekabrın sonuna kimi); fərdi sahibkar fəaliyyəti ilə (2011-ci il sentyabrın sonuna kimi) məşğul olan fiziki şəxslərin qeydiyyatı üçün proqram təminatının hazırlanması planlaşdırılır.
Beşinci blok başqa dövlət orqanlarının informasiya sistemlərindən istifadə etmək imkanını daxil edir. 2011-ci ilin sonuna kimi bu istiqamətdə Vergilər Nazirliyi Daxili İşlər Nazirliyi, Dövlət Statistika Komitəsi, Dövlət Gömrük Komitəsi, Dövlət Sosial Müdafiə Fondu, Ədliyyə Nazirliyi və başqa dövlət qurumları ilə inteqrasiyanı genişləndirməyi planlaşdırır.