Məlumat Hesablama Mərkəzi ilə “Premium Bank” “Bulud əsaslı imza” layihəsinə start verdi

Nəqliyyat, Rabitə və Yüksək Texnologiyalar Nazirliyinin Məlumat Hesablama Mərkəzi və “Premium Bank” arasında “Bulud əsaslı imza” layihəsi istiqamətində əməkdaşlığa start verildi.

Bu gündən etibarən “Premium Bank” müştərilərini “Bulud əsaslı imza” sertifikatları ilə təmin edəcək.

“Bulud əsaslı imza” bank əməliyyatlarını daha rahat şəkildə aparmaq, sənədlərin imzalanması prosesini elektron formada, təhlükəsiz və sürətli həyata keçirmək imkanı yaradır. “Bulud əsaslı imza” idarəçilik sistemi həm hüquqi öhdəliklərin təsdiqlənməsi, həm də təhlükəsizlik amili üzrə etibarlı mühitin yaradılmasını özündə əks etdirir.

Sözügedən imza sertifikatını əldə etmək üçün vətəndaş “Premium Bank”a müraciət edərək şəxsi məlumatlarını təqdim edir. Bu məlumatlara müştərinin şəxsiyyət vəsiqəsi məlumatları, istifadə etdiyi telefon nömrəsi (adına olması şərt deyil), elektron poçt ünvanı daxildir. Bank operatoru şəxsi məlumatları sistemə daxil edir və 2 dəqiqə ərzində sertifikat hazırlanır. Sertifikatın hazır olması haqqında təsdiqləyici SMS və FİN kod müştərinin mobil nömrəsinə göndərilir.

Adıçəkilən sertifikat vasitəsilə sənədlər həm müştəri, həm də bank əməkdaşı tərəfindən qarşılıqlı imzalanır.

Azərbaycan Respublikasının mövcud qanunvericiliyinə əsasən, onlayn müstəvidə olan bu imzalama prosesi kağız üzərində imzalanmaya bərabər tutulur. İmzalanan sənədlərin təhlükəsizliyi tam qorunur.

Vətəndaş elektron xidməti seçdikdən sonra imzalama prosesi üçün birdəfəlik kod mobil nömrəsinə daxil olur. Sonra imzalanacaq sənədlər seçilir, açılan pəncərədə FİN kod və birdəfəlik kod daxil edilib OK düyməsi sıxılır. Bir neçə saniyə ərzində imzalanmış fayl (.edoc format) əldə olunur.

“Bulud əsaslı imza”nın etibarlılıq müddəti 3 il təşkil edir.

Qeyd edək ki, “Premium Bank”la birgə əməkdaşlıq nəticəsində reallaşan bu layihə vətəndaş məmnunluğunun artırılmasına xidmət edir. Bununla da vətəndaşlar məsafədən maliyyə hesabatlarını əldə edə, hesablarındakı qalıqlar barədə informasiya ala, bankla müqavilə bağlaya, kredit üçün müraciət edə və digər xidmətlərdən yararlana bilərlər.