“Microsoft” korporasiyası müxtəlif məhsullarında 129 boşluğu aradan qaldıran aylıq təhlükəsizlik paketini çıxarıb. Təhlükəsizlik paketində çoxlu sayda aşkar edilmiş və aradan qaldırılmış problemlərə baxmayaraq, “sıfır gün” boşluğu ilə bağlı düzəliş yoxdur. Bu o deməkdir ki, bu paketdə düzəldilmiş boşluqlar hələ ki təcrübədə hakerlər tərəfindən istifadə edilməyib.
“ICTnews” Elektron Xəbər Xidməti “3dnews.ru” saytına istinadən yazır ki, müəssisə və dövlət təşkilatlarında kompüterlərə xidmət göstərən sistem administratorlarına təhlükəsizlik yeniləmə paketini tez bir vaxtda sınaqdan keçirmək tövsiyə edilir. Bu tövsiyə onunla izah olunur ki, cinayətkarlar “Microsoft” tərəfindən çıxarılan yeniləmələri diqqətlə izləyir və paketi yükləməyən istifadəçilərə qarşı haker hücumları həyata keçirmək üçün faydalı ola bilən məlumat əldə etməyə çalışırlar.
Emil Hüseynov