“Vmall” platformasında satışlarına yaxın vaxtlarda başlanılacaq “Huawei C5 10 2020” planşet kompüterinin xüsusiyyətləri barədə məlumat dərc edilib.
“ICTnews” Elektron Xəbər Xidməti “3DNews” resursuna istinadən yazır ki, yeni qurğu 2000 × 1200 piksel təsvir ölçülü “2K” formatlı 10,4 düym diaqonallı ekranla təchiz edilib. Planşet ilk növbədə albom və portret şəklində istifadə üçün nəzərdə tutulub. Ön kameranın korpusun uzun tərəfinin mərkəzində quraşdırılması məhz bununla izah olunur. Bu modulun təsvir ölçüsü 8 milyon piksel təşkil edir.
Məlumata görə, qurğu “Kirin 810” prosessoru üzərində qurulub. Çipə 2,27 QHs takt tezlikli iki “ARM Cortex-A76” nüvəsi və 1,88 QHs takt tezlikli altı “ARM Cortex-A55” nüvəsi daxildir. Qrafikanın emalı “ARM Mali-G52 MP6 GPU” sürətləndiricisi tərəfindən həyata keçirilir.
“Huawei C5 10 2020” 4 giqabaytlıq operativ yaddaş, 64/128 giqabaytlıq quraşdırılmış yaddaş, “Wi-Fi” (2,4/5 QHS) və “Bluetooth 5.1” simsiz rabitə adapterləri, eləcə də 8 meqapikselli arxa kamera ilə təchiz olunub. Enerjini “USB Type-C” simmetrik çıxışı vasitəsilə doldurulan 7250 milliamper/saat tutumlu akkumulyator batareyası təmin edir.
“4G/LTE” mobil rabitə şəbəkəsini dəstəkləyən və dəstəkləməyən olmaqla iki versiyada təklif ediləcək “Huawei C5 10 2020” planşetinin qiyməti 330-385 dollar təşkil edəcək.
Nizam Nuriyev