“Google” şirkəti onlayn xəritələrdə “Street View” rejimi üçün panoramlı şəkillərin yaradılması prosesini sadələşdirib. Şirkətin rəsmi bloquna görə, artıq “ARCore” platformasını dəstəkləyən müasir “Android” smartfonlarının istifadəçiləri öz dairəvi panoramlarını yarada və onları servisə yükləyə biləcəklər.
“ICTnews” Elektron Xəbər Xidməti “Vesti” resursuna istinadən yazır ki, olma yerini (location) paylaşmaq imkanı ilk dəfə ABŞ (Nyu-York və Ostin), Nigeriya, İndoneziya və Kosta-Rika sakinləri üçün istifadəyə verilib. Tezliklə “Google Maps” servisinin fəaliyyət göstərdiyi digər regionların da əlavə olunacağı gözlənilir.
İstifadəçi kontenti “Google” şirkəti “Street View” rejimi üçün öz şəkillərinə malik olmayanda cəlb ediləcək. Uyğunluq təşkil edən qurğuların siyahısı ilə “Google” şirkətinin saytında tanış olmaq mümkündür.
Qeyd edək ki, “Google” dünya şəhərlərinin panoramlı görüntülərinin yaradılması ilə 2007-ci ildən məşğul olur. Bu müddət ərzində 170 milyarddan çox şəkil toplanıb. Çəkilişlər avtomobil, üçtəkərli velosiped və xüsusi avadanlıqla təchiz edilən bel çantaları vasitəsilə aparılır.
Həvəskarlar tərəfindən paylaşılan panoramlı şəkillər punktirli mavi xətlərlə işarələnəcək.
Nizam Nuriyev