Yeni texnologiya avtomatik şüşə qapıları “OLED” displeylərə çevirəcək

“LG Electronics” (LG) şirkəti kommersiya və yaşayış binaları üçün İsveçin məşhur “ASSA ABLOY Entrance Systems” avtomatik qapı sistemləri istehsalçısı ilə anlaşma memorandumu imzalayıb.

“ICTnews” Elektron Xəbər Xidməti “3DNews www.3dnews.ru” resursuna istinadən yazır ki, tərəflərin əməkdaşlığının ilk faydası tayları üzvi işıq diodları (OLED) əsasında nəhəng şəffaf ekranlara çevriləcək sıyırma qapılar olacaq. Belə panellərdə reklam banerləri, müəyyən məlumatlar, faydalı informasiya və s. göstəriləcək.

Şəffaflıq sayəsində qapı üzərində görüntünü və onun arxasındakı vəziyyəti görmək mümkün olacaq. Həmçinin bina, ticarət mərkəzləri və müxtəlif salonların sahibləri xüsusi kontent idarəetmə sistemindən istifadə edərək panellərdə görüntünü istəyə uyğun dəyişə biləcəklər.

Məlumata görə, “ağıllı” qapıların əsasını “55EW5G” adlı şəffaf “OLED” ekranları təşkil edəcək. Onların diaqonal ölçüsü 55 düymə bərabərdir və 1920 × 1080 piksel təsvir ölçüsünə malikdir. Sıyırma qapıların hər bir tayı bir neçə belə ekrandan ibarət olacaq.

Qeyd olunur ki, yeni həll müsbət istismar xüsusiyyətlərinə malikdir. Displeylər fiziki təsirlərə yüksək davamlılıq və dayanıqlığı ilə seçilən möhkəm şüşə ilə qorunur.

Nizam Nuriyev