İTİ ilə Qafqaz Universiteti əməkdaşlıq edəcək

Bu gün Qafqaz Universiteti ilə Azərbaycan Milli Elmlər Akademiyasının İnformasiya Texnologiyaları İnstitutu (AMEA İTİ) arasında əməkdaşlığa dair anlaşma memorandumu imzalanmışdır.

İmzalanma mərasimində Qafqaz Universitetinin rektoru, professor Əhməd Saniç rəhbərlik etdiyi ali məktəbin fəaliyyəti barədə məlumat vermişdir. Universitetdə təhsilin inkişafı üçün reallaşdırılan tədbirlərdən danışan rektor bu sahədə informasiya-kommunikasiya texnologiyalarının tətbiqinin əhəmiyyətini diqqətə çatdırmışdır.

İnformasiya Texnologiyaları İnstitutunun direktoru, AMEA-nın müxbir üzvü Rasim Əliquliyev Azərbaycan Prezidenti İlham Əliyevin elmə, təhsilə daim böyük önəm verdiyini bildirmişdir.

Müasir dünyada elmin, təhsilin, o cümlədən informasiya texnologiyalarının önəmli rolundan bəhs edən R.Əliquliyev ölkəmizdə bu sahələrin inkişaf etdiyini söyləmiş, İTİ ilə Qafqaz Universiteti arasında əlaqələrin əhəmiyyətini vurğulamışdır.

Sonra əməkdaşlığa dair anlaşma memorandumu imzalanmışdır.Sənədi professor Ə.Saniç və AMEA-nın müxbir üzvü R. Əliquliyev imzalamışlar.

Memorandumda birgə elmi-tədqiqatların aparılması, innovasiya layihələrinin hazırlanması və reallaşdırılması, elmi kadrların hazırlanması, konfrans və seminarların keçirilməsi və digər məsələlər nəzərdə tutulur.