“Thunderbolt” texnologiyasını dəstəkləyən “Windows” fərdi kompyuterləri 2012-ci ilin aprel ayında çıxa bilər

“İntel” və “Apple” korporasiyası tərəfindən hazırlanmış verilənlərin yüksək sürətlə ötürülməsi protokolu “Thunderbolt” texnologiyasının tezliklə “Windows” əməliyyat sistemi ilə işləyən kompyuterlərdə tətbiq olunacağı haqqında informasiya artıq KİV-də (Kütləvi İnformasiya Vasitələri) bir müddət əvvəl çıxmışdı.

Lakin Tayvanın “DigiTimes” nəşrinin yeni məlumatına əsasən, “Thunderbolt” texnologiyasını dəstəkləyən “Windows” fərdi kompyuterləri artıq 2012-ci ilin aprel ayında çıxa bilər.

“Sony” və “ASUS” şirkətlərinin “Thunderbolt” portları ilə təchiz edilmiş noutbuk və stolüstü fərdi kompyuterlər təqdim edəcəyi gözlənilir. Bundan əlavə “ASRock” və “Gigabyte” şirkətlərinin yeni standartı dəstəkləyən sistem lövhələr istehsal edəcəyi də gözlənilir.

Qeyd etmək lazımdır ki, “Thunderbolt” texnologiyası ilk dəfə “Light Peak” kod adı ilə çıxıb. Yeni standart “PCİ Express” və “DisplayPort” interfeyslərinin texnologiyalarına əsaslanır. “Thunderbolt”  texnologiyasında verilənlərin ötürülmə sürəti  10 Qb/s təşkil edir. Texnologiyanın tətbiq olunduğu ilk qurğu “MacBook Pro” noutbukları olub.

---