Daha 500 məktəb yüksəksürətli internetə qoşulub

Hazırda Respublika üzrə internet şəbəkəsinə qoşulan məktəblərin ümumi sayı 1000-ə yaxındır. Bu ötən ilin sonunadək daha 500 məktəbin genişzolaqlı internetə qoşulmasından sonra mümkün olub.Təhsil Nazirliyindən verilən məlumata görə, bu rəqəmin yarıdan çoxu Bakının payına düşür.

İdarədən verilən məlumatda qeyd olunur ki, məktəblər "AZEduNet" təhsil şəbəkəsinə avtomatik qoşulublar ki, bu şəbəkə də təhsil müəssisələrinə nazirliyin məlumat-resurs mərkəzində yerləşdirilmiş elektron təhsil resursları və idarə sisteminə sürətli qoşulmağa imkan yaradır.

Bu gün Təhsil Nazirliyi tərəfindən orta ümumtəhsil məktəblərinin kompyuterləşdirilməsinin növbəti mərhələsinin gerçəkləşdirilməsi üzrə işlər aparılır.

Layihənin əsas məqsədi İT-dən istifadə yolu ilə təhsilin keyfiyyətini artırmaq üçün vahid təhsil informasiya mühitinin yaradılması və ölkənin dünya təhsil sisteminə inteqrasiyasıdır.

Bu, ölkənin təhsil sistemini effektiv şəkildə idarə etməyə, həmçinin, internet şəbəkəsi vasitəsilə xarici ölkələrin təhsil müəssisələri ilə əlaqə saxlamağa imkan verəcək.

  Qeyd edək ki, işlər 2008-2012-ci illərdə Azərbaycan təhsil sisteminin informasiyalaşdırılması üzrə Dövlət Proqramı çərçivəsində həyata keçirilir.
 

---