Bakının telefon qovşaqlarının xidmət səviyyəsi yoxlanılır

Bakı Telefon Rabitəsi İstehsalat Birliyi vətəndaşlara göstərilən xidmət mədəniyyətinin daha da yüksəldilməsi məqsədilə telefon qovşaqlarında monitorinqlər aparır. Bu barədə birlikdən verilən məlumatda bildirilir.

Məlumatda qeyd edilir ki, vətəndaşlarla canlı söhbətlərdən əlavə telefonla mənzillərə zənglər edilir, onlara göstərilən xidmət haqqında söhbətlər aparılaraq nəticələr təhlil olunur.

Eyni zamanda monitorinqlərin davamlı olaraq aparılması nəticəsində qarşıya çıxan nöqsan və çatışmazlıqlar da aradan qaldırılır ki, bu da vətəndaşların razılığı ilə qarşılanır. Birlikdən verilən məlumata görə, sorğunun nəticələri qənaətbəxşdir.