Sabirabadda təbii fəlakət nəticəsində sıradan çıxmış telefon xətlərinin bərpası davam etdirilir

Kür çayının məcrasından çıxması nəticəsində yaşayış yerlərini tərk edən Sabirabad sakinlərinin evlərinin bərpa olunması ilə əlaqədar mənzillərinin telefonlaşdırılması işləri davam edir.

Sabirabad TKQ-nın rəisi Sabir Bağırov “İCTnews” elektron xəbər xidmətinə bildirib ki, Qasımbəyli kəndində konteyner tipli tikilidə 160 nömrə tutumlu  elektron ATS qurulub. Onun sözlərinə görə, bu günə qədər 45 abunəçinin telefonu bərpa edilib.

Bu kənd EATS-dən Muradbəyli və Axtaçı kəndləri sakinlərinə də telefon çəkiləcək. Bundan başqa “Aztelekom”İB-nin qərarına  əsasən, məlum fəlakət zamanı evləri yararsız hala düşən Saatlı rayonu Novruzlu kəndinin sakinləri üçün salınan yeni Novruzlu qəsəbəsində qurulan 128 nömrə tutumlu elektron ATS-ə xidmət etmək Sabirabad TKQ-yə həvalə olunub.

Hazırda qəsəbədə 20 abunəçinin mənzili telefonlaşdırılıb. Rəis yaxın vaxtlarda abunəçilərin yüksəksürətli internet xidmətlərindən istifadə etməsinə də şərait yaradılacağını bildirib.

Sabirabad TKQ tərəfindən digər kəndlərdə də rabitənin günün tələbləri səviyyəsinə gətirilməsi üçün tədbirlər həyata keçirilir. Belə ki, hazırda Qalağayın və Əhmədabad kəndlərinin mərkəzi elektron ATS-lə birləşdirici xətlərinin optik kabellə əvəzlənməsi istiqamətində son tamamlanma işləri həyata keçirilir.

Həyata keçirilən tədbirlər nəticəsində adıçəkilən kəndlərin sakinləri də müasir rabitə xidmətləri ilə təchiz ediləcək.

Qeyd edək ki, hazırda Sabirabad üzrə telefon abunəçilərinin sayı 7 min nəfər təşkil edir. 700 nəfərdən çox abunəçi  sürətli internet şəbəkəsinə qoşulub. 

---