Artıq 58 rayonda vətəndaşlara “elektron imza” verilməsi həyata keçirilir

Artıq Azərbaycanın 58 rayonunda vətəndaşlara, hüquqi və fiziki şəxslərə, dövlət qulluqçularına elektron imza verilməsi həyata keçirilir. ”Azərpoçt”MMC-nin poçt marketinq şöbəsinin rəisi Adil Rəhmanovun “İCTnews” elektron xəbər xidmətinə verdiyi məlumata görə, Məlumat Hesablama Mərkəzi ilə “Azərpoçt” MMC arasında imzalanan müqaviləyə görə bütün müştəri xidmətləri şöbəsində Qeydiyyat mərkəzləri ən yüksək tələblər formasında yaradılıb.

A.Rəhmanov bildirdi ki, bunun üçün MHM tərəfindən lazımi avadanlıqlar quraşdırılaraq, texniki işlər həyata keçirilib. Vətəndaşlara yüksək səviyyədə və operativ olaraq xidmət işini yerinə yetirmək məqsədi ilə MHM tərəfindən “Azərpoçt” MMC-nin mütəxəssislərinə davamlı olaraq treninqlər keçirilir.

Treninqdə iştirak edən iştirakçılara təlim materialları (videomaterial) və tədris vəsaitləri (QM operatorları üçün hazırlanmış təlimatlar, vətəndaşlardan tələb olunan və onlara verilən sənədlərin nümunələri və s. təqdim edilir.

Qeydiyyat mərkəzlərinə müraciət edən hər bir vətəndaş “Elektron imza və elektron sənəd haqqında” Azərbaycan Respublikası Qanununa uyğun olaraq şəxsiyyət vəsiqəsini, hüquqi şəxs və ya dövlət qulluqçusu olduqda qanunvericiliyə müvafiq digər sənədləri (hüquqi və fiziki şəxs, həmçinin sahibkarlar üçün nəzərdə tutulmuş etibarnamə, elektron imza sertifikatının alınmasına müraciət olunan işçilərin siyahısı, təşkilatın nizamnaməsi, dövlət qeydiyyatından keçməsi haqqında şəhadətnamə, Dövlət reyestrindən çıxarış, vergi ödəyicisinin qeydiyyatı haqqında bildiriş və digər qeydiyyat sənədlərini) təqdim edir.

Sənədlər Qeydiyyat Mərkəzi operatorları tərəfindən diqqətlə yoxlanıldıqdan və xidmət haqqı vətəndaş tərəfindən ödənildikdən sonra hər bir vətəndaşın adına ərizə formalaşdırılır.

Ərizəyə daxil edilən şəxsi məlumatlar İAMAS (Daxili İşlər Nazirliyinin bazası) ilə yoxlandıqdan və Mərkəz səlahiyyətlisi tərəfindən təsdiq edildikdən sonra məhsulun emalı prosesinə başlanılır.

Tam məhsul paketləri (vətəndaşa aid olan smart kart, pin kod zərfi, kağız daşıyıcıda olan 2 nüsxə sertifikat, 2 nüsxə müqavilə) hazır olduqda dəstlənərək müvafiq Qeydiyyat mərkəzlərinə çatdırılır və vətəndaşlara qanunvericilikdə nəzərdə tutulmuş qaydada təqdim edilir.

Bundan əlavə Azərbaycan Respublikası vətəndaşlarının “e-imza”dan istifadəsini asanlaşdırmaq məqsədilə “www.e-imza.az” saytı da istifadəçilərin istifadəsinə verilmişdir.

Bu sayt istifadəçilərə: İmza sahiblərinin fərdi məlumatları əsasında axtarış aparmağa, sertifikatlarının detallarına baxmağa; Sertifikatları yoxlamağa; Sertifikat hadisələrinin tarixçəsinə baxmağa; “e-imzalayıcı” proqramını yükləməyə və eyni zamanda “e-imza” ilə bağlı onları maraqlandıran suallara cavab tapmaq imkanı verir.