Azərbaycan Prezidentinin adı 2012-ci ilin ən nüfuzlu şəxslərinin siyahısına daxil edilib

Böyük Britaniyanın məşhur "The Times" qəzetində və saytında dərc edilmiş məqalədə bildirilir ki, Azərbaycan Prezidenti İlham Əliyevin adı 2012-ci ildə dünyada diqqəti ən çox cəlb edən və nüfuz sahibi sayılan 100 nəfərin siyahısına daxil edilib.

"The Times" Prezident İlham Əliyevin şəxsiyyətini səciyyələndirərək yazır: "Prezident İlham Əliyev bəyan edir ki, Azərbaycan dünyada ən sürətlə inkişaf etməkdə olan ölkədir". Məqalədə deyilir ki, Böyük Britaniya bunu hiss etməyə başlayır.

Bakıda ticarət mərkəzlərinin və beşulduzlu otellərin sayı artır, bu isə onu "Xəzər sahilində Dubay" adlandırmağa əsas verir. "The Times" yazır ki, bu yaxınlarda Londonda Azərbaycan restoranı açılmış və "Baku" jurnalının ingilis dilində versiyası nəşr edilməyə başlayıb.

"The Times" qəzetinin reytinqinə siyasətçilərdən Azərbaycan Prezidenti ilə yanaşı, ABŞ Prezidenti Barak Obama, AFR Kansleri Angela Merkel, Böyük Britaniyanın Baş naziri Devid Kemeron, İsrailin Baş naziri Binyamin Netanyahu, Kraliça II Yelizaveta, habelə Fransada qarşıdakı prezident seçkilərində Sarkozinin əsas rəqibi Fransua Olland daxildirlər.

---