“USB 3.0” texnologiyasını dəstəkləyən smartfon və planşetlər ilin sonuna kimi istehsal edilə bilər

Mobil qurğular il ərzində "USB 3.0" (SuperSpeed USB) texnologiyası ilə təchiz ediləcəklər, -"USB İmplementers Forum" qeyri-kommersiya təşkilatının texniki direktoru Rəhman İsmayıl (Rahman İsmail) bildirib.

"MicroUSB 3.0" portu ilə təchiz edilmiş smartfon və planşet kompyuterləri verilənləri 800 Mbit/s sürətlə ötürə biləcəklər. Bu, "USB 3.0" texnologiyasını dəstəkləyən fərdi kompyuterlər ilə müqayisədə azdır.

Məlumat üçün qeyd edək ki, "USB 3.0" texnologiyasını dəstəkləyən fərdi kompyuterlərdə verilənlərin ötürülmə sürəti 5 Qbit/s-dir.

Ötürmə sürətinin az olması sərf edilən enerjiyə olan tələb və akkumulyator batareyasının yükünün effektiv xərclənməsi ehtiyacı ilə izah olunur.Yeni standarta keçidin mobil qurğularda verilənlərin ötürülməsi sürətini təxminən 10-12 dəfə artırmağa imkan verəcəyi qeyd edilir.

"USB 3.0" texnologiyasını dəstəkləyən smartfon və planşetlər bazarda bu ilin sonu və ya 2013-cü ilin əvvəlində çıxa bilər.
 

---