Musiqi satışları azalır

Beynəlxalq Fonoqrafik Sənaye Federasiyası (IFPI) 2011-ci ildə musiqi bazarının həcmini qiymətləndirib.
Musiqinin fiziki daşıyıcılar və internet vasitəsilə satışlarından 16,2 milyard dollar əldə edilib. Bu, 2010-cu il ilə müqayisədə 3% azdır. Satışlar artıq 7 ildir ki azalmağa doğru davam edir: 2004-cü ildə bazarın həcmi 24,3 milyard dollar təşkil edirdi.

Bununla belə əvvəlki kimi musiqi veb-xidmətlərinin populyarlığı artır. Ötən il ərzində internet vasitəsilə audio məhsulun yayılmasından əldə olunan gəlir 8% artaraq 5,2 milyard dollar təşkil edib. Aparıcı musiqi internet-xidmətləri artıq dünyanın 58 ölkəsində xidmət göstərir.

Trek və albomların internet vasitəsi ilə satın alınması keçən il 3,6 milyard dollara çatıb. Bu göstərici 2010-cu il ilə müqayisədə 17% çoxdur.

“Gartner” şirkəti hesab edir ki, 2012-ci ildə veb-xidmətlər vasitəsilə musiqi məhsulunun yayılmasından 6,8 milyard dollar dəyərində mədaxil əldə olunacaq. Onilliyin ortalarında isə bu məbləğ 7,7 milyard dollara qədər artacaq.