Magistraturaya qəbulda da “elektron-imza”dan istifadə ediləcək

Tələbə Qəbulu üzrə Dövlət Komitəsi magistraturaya qəbulda da "elektron imza"dan istifadə edəcək. Bunu komitənin magistratura şöbəsinin müdiri Natiq Əliyev bildirib.

Onun sözlərinə görə, "elektron imza"sı olan bakalavrların ərizəni sənəd qəbulu komissiyalarında təsdiq etdirmələrinə ehtiyac olmayacaq. Bu il həmçinin bakalavrlar ödəmə kartlarını virtual şəkildə əldə edəcəklər. Virtual ödəmə kartı internet ödəmə ilə və ya SMS göndərməklə əldə oluna bilər. SMS-in qiyməti 2 manatdır.

Elektron imzadan istifadə edən bakalavrlar istisna olmaqla, qalan bakalavrlar ərizələrini təsdiq etdirmək üçün sənəd qəbulu komissiyalarına (SQK) tələb edilən sənədlərin əslilərini şəxsən təqdim etməlidirlər.

Cari ilin məzunları "bakalavrın elektron ərizə forması"nı bitirdikləri ali təhsil müəssisəsində yaradılan SKQ-da təsdiq etdirəcəklər.

Ali məktəbləri əvvəlki illərdə bitirənlər və nəzdində SKQ fəaliyyət göstərməyən ali təhsil müəssisələrinin bu ilki məzunları bakalavrın elektron ərizə formasını ali təhsil müəssisələrində yaradılan istənilən bir SKQ-da təsdiq etdirə bilərlər.

Qeyd edək ki, həyata keçirilən layihə "Elektron Hökumət" proqramının tərkib hissəsidir.