“1 şagird -1 kompyuter” konsepsiyası əsasında təlimlər martın əvvəllərində yekunlaşacaq

Azərbaycanın seçilmiş orta ümumtəhsil məktəblərində aparılan "1 şagird -1 kompyuter" layihəsi üzrə təlimlər mart ayının əvvəllərinə başa çatdırılacaq. Artıq üç təhsil müəssisəsində bu təlimlər yekunlaşıb. Hazırda beş məktəbdə təlimlər aparılır, bir necə orta məktəbdə də bununla bağlı işlərə başlanılıb.

Ümumilikdə mart ayının sonuna qədər 15 pilot məktəbdə bu təlimlərin keçirilməsi planlaşdırılır. Bu barədə "İCTnews" elektron xəbər xidmətinə "İntel" təhsil layihələrinin Azərbaycan üzrə koordinatoru Teymur Məmmədov məlumat verib. Onun sözlərinə görə, adıçəkilən layihə "2008-2012-ci illərdə təhsil sisteminin informasiyalaşdırılması üzrə Dövlət Proqramı"nın reallaşdırılmasında

Təhsil Nazirliyinin əsas tərəfdaşlarından biri olan "Mədəd" humanitar təşkilatı tərəfindən həyata keçirilir. T.Məmmədov bildirib ki, "İntel" şagird netbuku paylanmış və "1 şagird -1 kompyuter" konsepsiyası əsasında təlimlər aparılan pilot məktəblər həm Bakı, həm də Sumqayıt şəhərlərinin payına düşür: " Ümumiyyətlə, məktəblərə "İntel" modeli əsasında yaradılmış 2400 şagird netbuku paylanılıb. Layihə üzrə təlimlərə məktəblərin netbuk paylanmış siniflərinə dərs keçən müəllimlər çəlb edilir.

Təlimlər zamanı sinif idarəetmə proqramları, layihə metodikası və "1 şagird -1 kompyuter" elektron öyrənmə mühiti tədris olunur. Təlimləri keçmiş müəllimlər dərslərini müvafiq konsepsiya üzrə netbuklardan istifadə etməklə tədris edirlər".

HƏQİQƏT

---